روچگ ءِ جیڑہ۔ رجانکار: زاھدہ رئیس راجی
روچگ ءِ جیڑہ
رجانکار: زاھدہ رئیس راجی
اولی جیڑہ :
روچگ ءِ نیت چون ءُ کجام وھدءَ کنگ بیت؟
پسّہ :
بسم اللہ الرحمن الرحیم
نیت نامے دل ءِ تہ ءَ اردہ کنگ ءِ۔ اگان یکے چہ دل ءَ پکّا ارادہ بہ کنت کہ من باندا رمزان ءِ روچگ ءَ دارآں، اے ارداہ آئی ءِ نیت شمار بیت۔
پہ روچگ ءِ نیت ءَ چہ زبان ءَ اربی زبان ءِ اے گالرد یا جملہ ءِ درشانگ المی نہ انت:
بصوم غد نویت من شهر رمضان
پرچہ کہ چہ ھچ ادیس ءَ سابت نہ انت کہ بائد ھمےداب ءَ گوشگ بہ بیت۔ ءُ اے گالرد یا جملہ ءِ زبان ءِ سرءَ نیت کنگ ءَ وتی سرءَ لازم ءُ المی مارگ ءُ زانگ پھک ءَ رداِنت۔
پہ رمزان ءِ روچگاں بس ھمنچو ارادہ کنگ یا نیت کنگ المی انت کہ من مروچی روچگ آں، یا من مروچی روچگ باں یا اگاں شپ ءِ وھد ءَ کسے نیت بہ کنت کہ من باندا روچگ باں۔ روچگ ءِ نیت منّگ بیت ءُ چدءُ گیش گوشگ المی نہ انت۔
بے نیت یا ارادہ ءَ روچگ ءِ دارگ ءَ آلم ءُ مُپتی (عالم و مفتی ) شر نہ گوش انت۔ آھانی گوشگ ءِ ردءَ بے روچگ ءِ نیت ءَ کسے وت ءَ چہ سُھب ءَ بہ گرتاں بیگاہ ءَ شُدیگ ءُ تُنیگ بہ کنت آئی ءِ روچگ روچگ کمار کنگ نہ بیت ۔ نیت کنگ ءِ شرتریں وھد چہ بانگواہ ءَ پیسرئیگ اِنت۔
اگاں اے وھدءَ کسے شموش ایت، نیت نہ کنت ءُ شُد ءُ تُنّ ءَ برجاہ دارایت گُڑا نیم بیل ءَ یا نصفِ نہار ِ شرعی ءَ بزاں چہ نیم روچ ءَ یک ادارے پیسرءَ نیت کنگ ءِ رزا ھست۔ نصفِ نہارِ شرعی ءِ متلب ءُ بزانت ایش انت کہ شرعیت ءِ توک ءَ روچ چہ رودراتک ءَ بہ گرتاں روایرکپت ءِ وھد گوشگ بیت۔
اگاں اے وھد ءِ درگت (دوران )ءَ یا روبرکت ءَ پیش، نیت کنگ بیت، گُڑا روچگ ، روچگ ھساب کنگ بیت نتہ نہ۔
٭٭٭
جیڑہ 2: روچگ کئی سرءَ پرز انت؟
پسّہ :
بسم اللہ الرحمن الرحیم
ھرھما مردم کہ آئی ءِ تہ ءَ اے پنچیں چیز ھوار بہ بنت:
1۔ مسلمانے بہ بیت۔ پرز روچگ ءِ دارگ ءِ اولی شرت مسلمان بَیگ انت۔ کاپر ءِ سرءَ روچگ پرز نہ انت ءُ نے کہ کُپر(کُفر) ءِ توک ءَ کسی روچگ شرعیت ءَ جائز گوشگ بیت۔
2۔ مکلّف بہ بیت۔ شرعیت ءِ تہ ءَ مکلف ھما مردمے کہ بالگ ءُ بودناک بہ بیت۔ کسان سالیں چُک ءُ دیوانگ ءُ نابالگ ستر جان ات دراہ بہ بیت بلے روچگ ایشانی سرءَ پرز نہ انت۔ البتہ نابالگین چُک ھما کہ روچگ داشت کن انت، مات پت آھاں روچگ دارگ بہ پرماینت تاں دیمترءَ ھیل بہ گِر اَنت۔
3۔ زیکت ئِے بہ بیت۔ بزاں انچیں مردمے کہ آئی ءِ جان ءَ زیکت مان ءُ آئی ءَ بدنی انچیں نادراھی یے یا نزوری یے نیست کہ چہ روچگ ءَ تاوان ئِے بہ رس ایت، آ روچگ بہ دارایت۔ اگاں کسے نادراہ انت بلے اُمیت است کہ دیمترءَ آ وش بہ بیت گُڑا روچگ یل دیگ ءِ رزا است بلے انچوش کہ اے نادراہ ءِ جان دراہ بیت آ ایشانی کزا یا الم ءَ بہ دارایت ۔ بلے کسے پیرءُ آجز انت ، یا انچیں نادراھی ءِ آماچ اِنت کہ دوبر دراھی ءِ اُمیت نیست ، گُڑا اے دوئیں فدیہ بہ دینت۔
4۔ مکیم بہ بیت ، بزاں مردم اگاں مساپرے ءُ انچیں سپرے ءِ توک ءَ انت کہ نماز ءِ کسر (قصر) آئی ءِ سرءَ واجب انت گُڑا روچگ مہ دارایت ءُ رندءَ کزا بہ دارایت بلے اگاں کسے سپر ءِ توک ءَ مارایت کہ من ءَ چہ روچگءَ ھچ مشکل دیم ءَ نئیت، شرتر گھتر ھمیش انت کہ روچگ ءَ بہ دارایت۔
5: اے پہ جنیں آدمان انت ۔ ھما جنین کہ ناپاک انت روچگ مہ دارایت ءُ رند ءَ کزا المی ءَ بہ دارایت۔ اگاں روچگ ءِ توک ءَ آئی ءِ سرشود اتکگ نوں آئی ءِ روچگ پاسد بیت انت ءُ جنیں آدماں ورگ ءِ رزا است بلے گھتر ھمیش انت کہ دگہ روچگدارانی دیم ءَ مہ وارت۔