سرگوست : بیا چورن بھا کن ایں (اولی بھر)

نبشتہ کار: زاھدہ رئیس راجی

بے روزگاری بلائیں وبالے ءُ ایشی ءِ بزگی ءُ واری ءَ ھما زانت کہ کار روزگارئِے چہ دست ءَ شُتگ ءُ شپ ءُ روچ جیڑ ایت کہ من چون وتی پڑءِ کارے دست بہ گراں ءُ وتی مالی جاوراں گھتر بہ کن آں۔  سرکاری ادارہ وھدے کارے ءِ جار ءَ پرین انت، آ گیشتر ھالتاک بزاں نیوز پیپراں دَینت بلے پرائیوٹ ادارہ مُدام جُھد کن انت کہ گیشیں ھرچ درچ آھانی سرءَ مئیت، پمشکا آھاں ریکورمنٹ ایجنسیاں چیزے زر دینت ءُ گوش انت کہ مارا ھروھدءَ کارمندانی زلورت کپت شما مارا مردم بیارات بہ دئیت۔

سرکاری کارانی سرءَ چوشکہ گیشتر سپاریشی جاہ دیگ بنت پمشکا اے ایجنسیانی لاپ سیر انت کہ اے یک نیمگے ءَ چہ ادارھاں کمیشن زور انت ءُ دومی نیمگءَ چہ بے روزگاریں مردماں کہ ما ترا اے کار ءَ دیگءَ ایں۔

اے ایجنسیانی کمیشن ءِ سوب ءَ بازینے تکانسر ات انت پمشکا سرجمیں دنیا ءَ انچیں ویب سائیٹ دیمءَ اتک انت کہ آھاں مپتی آسراتی ھردو نیمگءِ مردماں دیان کُت بزاں ھما ادارھاں کہ آھاں کاردار پکار ات ءُ ھما مردماں کہ کار شوھاز ءَ اودءَ رجسٹرڈ بوتگ انت۔

وھدے سوشل میڈیا یا چاگردی رسانکدرانی زمانگ اتک گُڑا ھمک ایجنسی ءُ ادارہ ءَ وتی تاک ءُ دیوان جور کُت۔ ریکورمنٹ گروپس ادءَ ھم اتک انت ۔ فیس بُک ءُ واٹس ایپ ءَ انچیں گروپ ٹھینگ بوت انت کہ اودءَ کارداراں وتی جار پرینت ءُ کارمنداں وتی زانت دپتر آھاں کلوہ یا ایمیل ءِ وسیلہ ءَ دیم دیان کُت ءُ بازینے ءَ کار رس ات ءُ بازینے پشت ھم کپت۔

چاگردی رسانکدرانی تہ ءَ یک دگہ جیڑہ یے ھم سر کش ات کہ فراڈ کنوک ھم دیم ءَ اتک انت۔ ھمےدرگت ءَ لنکڈ ان نامی سائیٹے دیم ءَ اتک کہ آھاں تچک ءَ اے گپ گشینت کہ اے سائیٹ فیس بُک نہ انت کہ ادءَ کسے ھم پہ بدیں نیت ءَ دومی ءَ رھوت بہ کنت ءُ ازیت  بہ کنت کہ چوشیں مردمانی ھلاپ ءَ ما ایکشن زور ایں۔ لنکڈ ان ءِ شری ایش ات کہ ادءَ تھنا پروفیشنل بزاں زانتکاریں کارمند گوں وتی ھمکاراں یکجاہ بنت ءُ انچیں ادارھاں ھمگرنچ بنت کہ اودءَ آ کار دزگرگ لوٹ انت۔

چہ دَہ سال ءَ گیش انت کہ منی پروفائل اودءَ ایراِنت بلے ھجبر چوشیں جیڑہ یے دیم ءَ نہ اتکگ کہ من ءَ اے نبشتانک نبیسگ بہ پرمائیت۔

کسہ چوش بوت کہ گوستگیں ھپتگ ءَ کنول نامی یک بانوکے ءَ من ءَ لنکڈ اِن  سائیٹءَ رھوت کُت کہ بانک زاھدہ تو کنسلٹینسی کنگ ءَ ئے، پمشکا پہ ترا مئے گورءَ شریں کارے است کہ ما ترا پنجاہ ھزار کلدار دئیں۔

بانک ءِ کلوہ ءَ رند من جیڑگءَ اتاں کہ اگاں اے بانک ءَ منی زانت دپتر ونتگ ات گُڑا چون نہ زانتگ ات کہ منی پگار اے وھدءَ چے بیگ لوٹ ایت کہ سرجمیں دنیا ءَ زانتکاریں پروگرامر ءُ سافٹ وئیر کنسلٹینٹ چہ لکھ ءَ بُرز زورگءَ انت ءُ اے مئے بے روزگاری ءِ سوبءَ چہ مارا ارزانی ءَ کار کشگ لوٹ ایت۔ بلے بے روزگاری انچیں وبالے کہ مردم ءَ وتی بستار ءِ دور دیگ ءَ اوں مجبور کنت۔

من بانک ءَ کلوہ دیم دات کہ منتواراں شما من ءَ کار دیگ ءَ دلمانگ ات، کمے اے کار ءِ باروءَ من ءَ سرپدی بہ دئیت کہ من ءَ چے کنگی انت ءُ چون کنگی انت ءُ باریں اے آن لائین کارے، اگاں نہ من ءَ پہ کار ءَ شمئے ادارہ ءَ آھگ کپ ایت یا  سپر کنگی انت۔

بانک ءَ دلجم کنائینت کہ ترا ھچ جاہ ءَ روگ ءِ زلورت نہ انت۔ ترا کارئیگی ٹرینگ ھم دیگ بیت، بزاں سرءُ سوج ھم کنگ بیت کہ تو چون اے کار ءَ کن ئے۔ بانک ءَ وتی گوانکو ءِ نمبر من ءَ دات کہ گوں من رھوت بہ کن، من ترا پارمے (فارم) دیم دیاں، تو آئی ءَ پُر کن، وھدے ترا مئے کار مستر گچین کن انت، ترا ٹرینگ دیگ بیت انت۔

واٹس ایپ ءِ سرءَ بانک ءَ پارم ءِ لنکے دیم دات کہ ایشی ءَ پُر کن۔

پارم ءَ انچیں جُست نیست ات انت کہ من بُگوش آں پروفیشنل بہ بنت چریشی ءَ منی زھن کمے گڑمنجے ءِ تہ ءَ کپت ءُ من وتی سرجمیں زانت دپتر (ھما کہ لنکڈ ان ءَ ایر نہ انت ءُ من مُدام تچک ءَ ادارھاں دیم دیاں ) آئی ءَ دیم دات، بانک ءَ کلوہ کُت کہ بانک من چہ تو سک باز متاثر بیتگ آں۔ تئی زانت دپتر سک زبردست انت ءُ تو چہ اے نوکیں کار ءَ زوت دیمروی کن ئے۔

اناگتہ منی چم بانک ءِ اسٹیٹس ءَ کپت کہ آئی ءَ بازیں کسان سالیں بانوکانی باپاری ءِ وسیلہ ءَ ملیونر بیگ ءِ سوبمندی دیم ءَ آرتگ ات۔

 من پدءَ سِٹّے کُت کہ اے چیز ھم نان پروفیشنل رویہ ات کہ مئے پڑءِ ھزاراں گیش آئی ٹی پروفیشنلز سرجمیں دنیا ءَ سوبین انت ءُ ملیون یا چہ ایشی ءَ گیش کٹگ ءَ انت، بلے یکے وتی سوبمندی ءِ کسہءَ چاگردی رسانکدر ءُ آھانی اسٹیٹساں نہ جنت۔

روان انت۔۔۔

٭٭٭٭