(طبیب جیڑگ ءِ اِت اَنت)
(طبیب جیڑگا اِت اَنت)
آ حیمہ ءَ عجیبیں بے تواری اَت
من دست گِپتگ اَت پِت ءِ
منا شہ پیش واجو ءِ ابیتکیں لُنٹ لَرز اِت اَنت
طبیب جان ءِ ہر رگ ءَ جواب لوٹگا اِت اَنت
جواب مِلّگا نہ یَت
عجیب بے تواری اَت
دمانے ءَ ابیتکیانی لشکرے ءَ دَور کُت
حیال کپت اے میان ءَ قرن قرن گْوستگ اَنت
گمان پیر بیتگ ءُ حیال تاک کپتگ اَنت
دریگ زنگ گِپتگ اَنت
زمانگے چو حاکے ءَ مئے لنکُکاں رِچان بیت
شگْوست ءُ شُت
ءُ ما کہ داں سما کُتہ ابیتکیانی جَنگل اِنت
ما مُونج دْرپشگا اِتیں
ما درد نالگا اِتیں
مئے ارس سبزگا اِت اَنت
کمالیں بے تواری اَت
منا شہ پیش واجو ءِ ابیتکیں لُنٹ لَرز اِت اَنت
عجیبیں بے تواری ءِ ہَشیمیں کوہ پُرشتگ اَت
طبیب جان ءِ ہر رگ ءَ جواب لوٹگا اِت اَنت
جواب مِلّگا نہ یَت
طبیب جیڑگا اِت اَنت
میرساگر