زبابانی زندان۔ سپرھال
سیمی بھر۔ مجاھد بلوچ
اے مراگش ءَ ڈرامہ یے پیش دارگ بوَگ ءَ ات۔پہ ایشی چارگ ءِ ھاترءَ رش سک باز ات،داں دور ءَ مردم سرپے ءَ اوشتاتگ ات انت۔اے ڈرامہ ءِ چاروک گیشتر ورنائیں جنک ءُ بچک ات انت۔مردمانی مچی ءِ سبب ءَ ھال ءِ تھا نندگ ءَ جاہ نیست ات۔کساس ھزار ءَ گیش مردم اے ڈرامہ ءِ چارگ ءَ اتکگ ات انت۔باز کس اوشتات انت داں سہ گھنٹہ ءَ اے ڈرامہ گوں دلگوش ءَ چار ات انت۔اے ڈرامہ ءِ تھا پاکستان ءِ سْیاسی،مزہبی معاشی جاور جوانیں رنگے ءَ پیشدارگ بوت انت۔اے مراگش ءَ ھچ ترس ءُ لرز نیست ات۔
چوشکہ اے مراگش ءِ جتا جتائیں بھر ات انت،ھمک ھال ءَ جتا جتا مراگش بوھگ ءَ ات۔یک مراگشے ءَ پنجاہ ءُ سد ءَ گیش مردم نیست ات۔ڈن ءَ ترءُ گرد باز ات،کیفٹریا ءَ رش است ات۔
آرٹس کونسل ءِ پشتی نیمگ ءَ پارلمینٹ ھاوس،سپریم کورٹ،سینٹ نزیک ات انت ،بلکن جْوانیں رنگے گندگ بوت انت۔
اے ندکار کہ پہ ماتی زبانانی دیمروئی اینکس کوکار ءَ ات انت باریں اے توار داں اے مڈیاں سر بوت انت کہ نہ؟؟؟؟یا اے ماڑی ایوکہ انگریزی ءُ اردوءَ سرپد بنت؟؟؟
دومی روچ ءَ بیگاہ ءَ ماتی زباناں مشاعرہ ءُ کتابانی دیم درائی بوت،اے مشاعرہ چھت ءَ رنگ ءُ نورانی تھا بوت بُرزا ازمان ات ءُ جھل ءَ ھمک رنگ ءِ انسان۔اے مراگش اجب چاڑے دیگ ءَ ات۔
اے مشاعرہ ءَ چہ بلوچستان ءَ غمحوار حیات،بانک حمیرا صدف،محتار واھگ ءُ دگہ باز ھوار ات انت،ایشاں شئر ھم وانت،بانک حمیرا صدف ءَ لچھانی تھا بلوچستانی درد ءُ گم،پریات ءُ چیھال،لوزانی دورشم ءَ بْیان کرت انت۔ھمے رنگ ءَ محتار واھگ ءِ شئر وانگ ءِ داب کلاں دوست بوت،ھر کس ءَ آئی ستا کرت۔
روان انت