زبانانی زندان۔سپرھال۔اولی بھر

مجاھد بلوچ

بہ گْوَشتن ءِ نواب اکبر بگٹی اسلام آباد ءَ  نہ اسلام است ءُ نہ اسلام ءِ  آبادی۔اسلام آباد ءِ  نام پہ بلوچاں شریں نامےنہ انت۔اسلام آباد ءَ  من باز رندءَ  شتگ آں۔اے رندی ماتی زبانانی سہ روچی لبزانکی مراگش ءَ  ھور بوھگ ءِ  موہ رست،اے مراگش ھمک سال انڈس کلچر فورم ءِ  نیمگ ءَ  اسلام آباد ءَ جتا جتائیں جاھاں برجم دارگ بیت۔

اے رندی 17داں 19 فروری ءَ  آرٹس کونسل اسلام آباد ءَ  برجم دارگ بوت، ایشی تھا بلوچی، براھوی، پشتو، سندھی، پنجابی، سرائیکی، ھزارگی، پھاڑی،گلگتی، گوجری،کشمیری،ہندکو،ھریانی، پوٹھوری، کتہ، واری، میواتی ،گوارباتی، بروشکی، کھوار،ءُ  دگہ زبانانی ندکاراں بھر زرت۔

17فروری بیگاہ ءِ چار بج ءَ اے مراگش ءِ بندات بوت۔من راہ ات آں بنداتی مراگش ءَ ساڑی نہ بوت آں۔اولی روچ ءَ بنداتی مراگش ءُ  ماتی زبانانی گچین ءِ  ندکاراں اھد بستگی داد دیگ بوتگ۔

بلوچی زبان ءَ  اے داد نامداریں ندکار ڈاکٹر فضل حالق ءُ  براھوی زبان ءَ  داد مزن نامیں ندکار ڈاکٹر عبدالراھمن براھوئ ءَ  دیگ بوتگ،اے دوئیں واجہ مراگش ءَ  ساڑی نہ بوتگ انت ایشانی داد پناہ بلوچ ءُ  ھسن نثار ءَ  دیگ بوتگ انت۔

18فروری اے مراگش ءِ دومی روچ ات ،ما مھلہ سر بوت ایں۔آرٹس کونسل پارلمنٹ ھاوس ءِ دیمی نیمگ ءَ انت۔ایشی دومنزل ءِ مزنیں ماڑی یے،کہ ایشی تھا آڈٹیورم۔کانفرنس ھال،ءُ دگہ کمرہ باز انت۔

دومی روچ ءِ  مراگش ءَ منی گدارُک ًآرواہءِ چیھانٹًءُ  براھوی زبان ءَ بانک اقرا جتک ءِ  گدار “ردوم”پھاڑی زبان ءَ  علی عدالتی ءِ “جاسوس”سرائیکی زبان ءَ  حفیظ خان ءِ “مارماجیون دی”پنجابی زبان ءَ  ھمید رازی ءِ “کوٹھی نمبر8،سندھی زبان ءَ نور جونجیو ءِ “نالی پنٹریں جو کہانج” ءُ اردو زبان ءَ  طاھرہ اقبالءِ “ہڑپہ”  ھور ات انت۔

اے مراگش ءِ  جار چین بانک زبیدہ بروانی ات۔اے مراگش ءَ  گدارءِ  ازمی تک ءُ  پھنتاں گیش آھانی بنگپانی ءِ  سرا باوست کنگ بوتءُ ھر کس ءَ  وتی گدارءِ  تاکدیمے وانت،گڈی جست ءُ  پد کنگ بوت۔چوشکہ منی گدار ءِ  بنگپ کمو باز گوں بلوچستان ءِ  انوگیں جاوراں سْیادی دار ایت،ایشی تھا کسانیں رنگے ءَ   بلوچستان ءُ  بلوچانی زندءِ  رنگے پیشدارگ بوتگ ،اے بابت ءَ  یک ءُ  دو جست کنگ بوت۔

روان انت

****