قدیر لقمان ءِ لچّہ . ارواہ ءِ مَٹّ۔
۔۔۔۔۔۔۔ارواہ ءِ مَٹّ۔۔۔۔۔
شائر: قدیر لقمان
شائر: قدیر لقمان
ستر بکن وتی راہاں چہ کِشک مٹّائین
ستر بنوش وتی مہروانی ءِ بنگ ءَ
ہمک نگاہ زیبائی ءِ نہ بیت عاشق
ہمک بہار نیاریت گْواڑگاں مہر ءِ
ہمک سِپاہ تئی توسیپ ءَ پہر بست نہ کنت
توئے کمال کنئے زندگی ءِ امبازاں
توئے کہ جوہراں چمّانی بنزہاں چارئے
اے چمّ پہ وتا شانتل تبے ءِ واہند اَنت
اے چمّ بے دل ءَ شاہینی زور جت نہ کن اَنت
اے چمّاں مہر بدئے ہال سر کن اَنت زرد ءَ
ستر مکن کہ دنیا پہ تو ہدوک بہ بیت
ستر مکن کی چو من پہ تو گنوک بہ بیت
کہ ہلک رولہ ءِ زیبائیں زَردیں رنگ ءَ گوں
چو کاڑی کنزیں سریگ ءَ وتارا مُلمہ کنت
نہ ماریت ہون چکیں ہسکاراں کرْتکگیں مرد ءِ
نہ زانت چوں ابیتک بنت تاک پلّانی
نگاہ کپت نہ بنت تاک ءُ بر بئینت یک نیاد
اے آزگی ءِ کدی کسّہاں نہ کُٹّینیت
ستر مکن منی مہرانی گنجیں وارث تو
کہ بے تو پہ من زمانگ کجا چو زیبا بیت
پہ من بچار منی ارواہ چو ارُزن ءَ بالیت
ءُ پہ ترا ہوں جہان ءِ نہ بنت اِنچو رنگ
ہمک رنگ ءَ نوکیں جہان ہوں جوڑ نہ بیت
ستر مکن ۔۔۔وتی راہ ءَ مدئے دگہ کِشکے
اے کِشک بلکیں دگہ میتگے ءَ سر کشّیت
اے کشک بلکیں جہانے دگہ بہ پرّیچیت
پدا ۔۔۔زمین ءُ زمان ءِ حقّی ئیں واھند
پدا ۔۔دل ءُ نگاھانی حقّی ئیں واھند
پدا۔۔مگیم جتیں آہانی حقّی ئیں واھند
نہ بنت زاہر ءَ اے ڈول۔۔مجاز ءُ نازیں چمن
ستر بہ ناریت چنال ءَ کپوتی ئیں چنگ ءَ
ستر کہ تپلے ءَ زرد ہوں مئے سچوک بہ بیت
ستر کہ نیادے ءَ ارواہ مئے زَروک بہ بیت