اگلمندیں بادشاہ۔ رجانکار: فیصل داد
اگلمندیں بادشاہ
آزمانکار : خلیل جبران
رجانکار : فیصل داد
یک وھدے ءِ گپّ انت کہ یک میتگے ءَ کہ آئی نام وَیرانی ات، یک بادشاھے ھاکمی کنگ ءَ ات۔ مردم آئی کُنگری ءِ سر ءَ تُرس اتگ ات انت ءُ آئی زانتکاری ءِ سَوَب ءَ پرائی ءَ ھُدوک ات انت۔
آ میتگ ءِ اَبیل ءَ یک چاتے ھست ات کہ آئی آپ سک سارت ات ءُ چو نِیلُم ءِ پیم ءَ اوھَر ات۔ میتگ ءِ درْستیں مردماں بلکیں بادشاہ ءُ آئی ءِ وزیراں ھم چہ ھمے چات ءَ آپ وارتگ ات پرچا کہ آئی ابید میتگ ءَ دگہ ھچ چات نیست ات۔
یک شپے وھدے کہ درستیں مردم واب ات انت گڑا یک جاتُوگے ماں میتگ ءَ اتک ءُ اَجبیں درمانے ءِ ھپت پِٹّ چات ءِ تہ ءَ مان ئِے کت ءُ گوْشت ئِے۔ “ایشی ءَ پد نوں ھر کسّے کہ اے چات ءِ آپاں وارت آ دیوانگ بیت۔”
دومی روچ ءَ بادشاہ ءُ آئی وزیراں اَبید میتگ ءِ درْستیں مردماں چات ءِ آپ وارت انت ءُ جاتُوگے گپانی پد ءَ آ دیوانگ بوت انت۔
ھما روچ ءَ میتگ ءِ سرجمیں مردماں یکّے دومّی ءِ گوشاں ھمے ھَبر گْوشت کہ مئے بادشاہ ءُ وزیرانی اگل جَنَگ بوتگ ءُ ما اے گنوک ءُ کورانی بادشاھی ءَ اوپار کت نہ کنیں ءُ آھاں چرے اگدھاں الّم دور کنیں۔
وھدیکہ شپ بوت گڑا بادشاہ ءَ سُھر ءِ تاسے ءِ تہ ءَ آ چات ءَ چہ آپ لوٹائینت۔ وھدیکہ آپ آرَگ بوت انت گڑا آئی ءَ وت ھم وارت ءُ وتی وزیراناں ھم وارینت ءُ پدا چے بوت۔ میتگ ء ویران ءَ وشّی ءُ شادمانی ءِ یک نوکیں باریگے بندات بوت پرچا کہ مردماں ھمے دیستگ ات کہ مئے بادشاہ ءُ وزیرانی دماگ نوں شرّ بوتگ۔
