اکبربارکزئی ءِ آزات لچّہ : دریگاں پچ کن ات بیلاں !
لچّہ: دریگاں پچ کن ات بیلاں !
لچّہ کار : اکبربارکزئی
دریگاں پچ کن ات بیلاں !
گلوءَ بستگیں بوج اِت
دریگاں پچ کن اِت بیلاں !
تھاریں کوٹی ءِ یک کُنڈے ءَ کپتگ، ھلاھوش اِت
پہ چے چو ژند ءُ ژول ءُ مردہ جان ءُ پھک ءَ دلپْروش اِت ؟
گلو ءَ بستگیں بوج اِت
دریگاں پچ کن اِت بیلاں !
نہ زان اِت پرچے ءَ چوش اِت؟
چہ وت پھک ءَ پراموش اِت
ھزاراں سال ءِ کْوھنیں موکوئی تندانی بندیگ اِت
وتی جند ءِ ھیال ءُ پکر ءِ زمزیلانی بندیگ اِت
وتی وھمانی باھوٹ ءُ وتی کستانی بندیگ اِت
وتی یاتانی بندیگ اِت
وتی جوسکانی بندیگ اِت
نہ زان اِت پرچے ءَ چوش اِت؟
گلو ءَ بستگیں بوج اِت
دریگاں پچ کن اِت بیلاں !
اے کوٹی زھرشانیں مار ءُ زوم ءُ لولکاں پُرّ اِنت
اے کوٹی بے مُرادی ءِ بدیں اِلّ ءُ گِشاں پُرّ انت
اے کوٹی ءِ تھاری ھنجر ءُ کاٹار ءِ پَیم ءَ اِنت
بدیں نمبی گْوش ئے چو زھرناکیں مار ءِ پَیم ءَ اِنت
اے کوٹی دُشمن اِنت مِھر ءِ
اے کوٹی ساہ گِر اِنت زند ءِ ھمک واھشت ءُ ارمان ءِ
کشوک انت آدمی زات ءِ مڑاہ ءُ منگھیں شان ءِ
پہ چے پُرسیگ ءُ سْیاہ پوش اِت؟
گلو ءَ بستگیں بوج اِت
دریگاں پچ کن اِت بیلاں !
کہ ڈنّ ءَ رُژن تالان اِنت
زبادیں گْوات کشّان اِنت
شراب ءُ کَیپ دْرنزان اِنت
بھار اِنت، مست ءُ ساچان اِنت
توار اِنت وشّیں مُرگانی
کھیب اَنت دْرچک دشتانی
گْوش ئے منگیر اَنت مستانی
گْوش ئے ائید اِنت مُرادانی
من زاناں انگت سرھوش اِت
گلو ءَ بستگیں بوج اِت
دریگاں پچ کن اِت بیلاں !