شائر: شریف مومن ۔ زمانگے گوں وتی جند ءَ یار اِتیں من ، تو
دستونک
شائر: شریف مومن
زمانگے گوں وتی جند ءَ یار اِتیں من ، تو
داں اِشک ءِ آسری کیپ ءَ کُمار اِتیں من ، تو
وپا ءِ تالہ ءِ نیمّون ءَ شپ سر ءَ لُمب اِت
سما نہ کپت کہ وھدے دُچار اِتیں من ، تو
اے آس ءَ تیوگیں دنیا ءِ رنگ مٹّائینت
نیتکیں پھکا اِد ءَ اَنچو گار اِتیں من ، تو
چراگ ءِ ھاجت ءَ بالو دل ءِ شھید کُت اَنت
توامیں دھر ءِ گماں بڈّ ءُ بار اِتیں من ، تو
کُجام ھستی ءِ سازندھیں دیار ءَ گم ئے ؟
جلشکیں بام ءِ زھیراں ھوار اِتیں من ، تو
سماہ ءِ جنگل ءَ مُرگانی سؤت پُرشتگ اِتنت
بلئے پہ چاڑیں دل ءَ بیتوار اِتیں من ، تو
شریفّ ، مُرتگیں ارواہ ءِ دامن ءَ دائم
نواھیں زند ءِ ازل رازدار اِتیں من ، تو