طیب صالح ءِ گدار موسم الھجرۃ اِلی الشمال
طیب صالح ءِ گدار موسم الھجرۃ اِلی الشمال
چندن ساچ
عبدالرحمان منیف عربی لبزانک ءِ یک مزنیں نامے، آئی ءَ جاہے گشتگ ات کہ
غلامیں مردم چیروکائی بازیں کار کننت ءُ پدا ہمیشاں چہ باز گل اَنت۔ زاہ دئیگ، دروگ بندگ ءُ وت گڑیں پندل سازگ، اسکینڈلز ءُ برہنگیں عکسانی چارگ، غلامیں راج ءِ مردماں وش بیت، بَلے ہمے چیزانی بابت ءَ گدار نشتہ کنوکاں نویسگ ءَ نئیل اَنت۔
بَلے طیب صالح ءَ اے گپانی پرواہ نہ کُتگ ءُ غلامیں چاگردے ءِ عکس کش اتگ ءُ موسم الھجرۃ الی الشمال ءِ نام ءَ مئے دیما ایر کتگ۔ طیب صالح 12 جولائی 1929 ءَ ماں سودان ءَ بوتگ۔ اِے گدار ہما چاگرد ءِ کسہ اِنت کہ اودا نبشتہ کار ءِ زندگی گوستگ ءُ گدار ءِ یک جوانی یے ایش انت کہ مردم ءَ سما نہ بیت ءُ یک انچیں ندارگے آئی ءِ دیما گوزیت آ پدا ہمے ندارگ ءِ چارگ ءِ واستا گدار ءِ ہما جاہاں وانیت کہ آئی ءَ بے سمائی گوازینتگ انت۔
گدار ءِ کارست آفندی ءُ مصطفیٰ سعید اَنت۔ چوناہ ءَ ادا کارست سک باز انت بَلے اسل کارست ہمے دوئین انت۔ دوئیں وانندگیں مردم اَنت ءُ آ نوآبادیاتی نظام ءِ بابت ءَ بازیں سرپدی دارنت۔ گدار ءِ بندات چش انت کہ آفندی لہتیں سال ءَ ڈنی ملکاں روت وانیت۔ آ وہدے پدا کہ وتی میتگ ءَ واتر کیت گڑا آئی ءِ چارگ ءَ بازیں مردم کاینت۔ آفندی درستیں مردم پجہ کاریت کہ آئی ءَ کسانی ءَ دیستگ انت۔ بَلے یک مردمے انچیں کیت کہ آفندی آئی ءَ نزانت۔ مردم کہ رونت گڑا آفندی وتی پیرک حاج احمد ءَ جُست کنت اے کئے اِنت؟ آ گشیت اے مرد مصطفیٰ انت ءُ خرطوم ءِ جہہ مند انت۔ اے مرد سوداگرے بوتگ۔ اِدا اتکگ چہ مردمے ءَ جاہ ئِے بہا زرتگ ءُ پدا ہمدا سور ءُ سانگ ئِے کُتگ۔ بَلے ایشی ءِ بابت ءَ کس نزانت کہ کئے انت ءُ کئی مردمان انت۔ اِدا کہ اتکگ گڑا ہرکسی دل ئِے گوں وت برتگ ءُ سکیں شریں مردمے۔
آفندی ءِ واہگ بیت کہ من مصطفیٰ ءِ بابت ءَ بہ زاناں۔ یک روچے نیمروچ ءِ وہد ءَ مصطفیٰ پہ آفندی ءَ کوٹگے کاریت کہ ایشی ءَ بور۔۔۔۔۔ ۔۔۔ انچو انچو ایشانی نزیکی گیش بوہان بیت۔ آفندی مصطفیٰ ءَ یک روچے شراب وارینیت۔ مصطفیٰ نشہ بیت ءُ نشہ ءِ وہد ءَ انگریزی ءَ مصطفیٰ شعرے وانیت۔ آفندی حیران بیت کہ مصطفیٰ گندگ ءَ چوشیں وانندہے نہ لگیت بَلے اِے انگریزی چون زانت؟۔۔۔۔۔
دومی روچ ءَ آفندی گوں مصطفیٰ ءَ دوچار کپیت ءُ ہمے شعر ءِ بابت ءَ جُست کنت کہ تو اِے شعر ونتگ ءُ آ ہم انگریزی ءَ۔ تو بگش کہ تئی راستی چی اِنت ءُ تو چہ کُجا اتکگ ئے؟ مصطفیٰ گشیت کہ بِل اِے گپاں نشہ ءِ تہا مردم بازیں گپ جنت۔۔۔۔ بَلے آفندی آئی ءَ یلہ نہ کنت ءُ پدا یک روچے مصطفیٰ وتی راستی ءَ بیان کنت کہ آ 16 اگست 1898 ءَ ماں خرطوم ءَ ودی بوتگ ءُ آئی ءِ پت عثمان آئی ءِ ودی بوہگ ءَ چہ پیسر مُرتگ۔ آئی ءِ مات آئی ءَ رودینیت۔ یک روچے مصطفیٰ دمکانی تہا یلہ بیت کہ سرکاری مردمے کیت۔ آ دگہ گونڈو تچنت ءُ مصطفیٰ نہ تچیت۔ آ مردم وتی اپس ءَ ایر کپیت آئی ءَ کلاہے سرا بیت۔ آ مرد مصطفیٰ ءَ گشیت کہ تو وانگ لوٹ ئے؟ مصطفیٰ آئی ءَ لہتیں جُست کنت ءُ پدا گوں آئی ءَ روت مدرسہ ءَ وانگ ءَ۔ ہمدا وانگ ءَ بندات کنت۔ شپ ءَ وتی مات ءِ گورا کیت گڑا مات آئی ءَ جُست کنت کہ تو سرجمیں روچ ءَ کُجا بوتگ ئے؟
مصطفیٰ گشیت کہ من وانگ ءَ بوتگاں۔ مصطفیٰ ءِ مات چہ اے گپ ءَ گل بیت۔ پدا مصطفیٰ وتی کلاس ءِ درستیں چُکاں چہ دیما بیت۔ یک نیمگے چورہی زند ءُ دومی نیمگا وانگ ءَ تیزی، گڑا استاد ہمے فیصلہ کننت کہ ترا ڈن ءَ وانگ ءَ روان دئیں گڑا مصطفیٰ سعید قاہرہ ءِ نام ءَ گیپت کہ اودا رواں۔۔۔۔۔۔ مصطفیٰ ءِ گپ مننگ بیت۔۔۔۔ رؤگ ءِ وہد ءَ مات ءَ حال دنت کہ من رؤگ ءَ یاں۔۔۔ مات سک گل بیت ءُ گشیت منی چُک۔۔۔ اگاں تئی پت زندگ بوتیں آئی ءَ ہم ہمے فیصلہ کتگ ات ءُ من ترا ہمے گشاں کہ تئی زندگی تئی اِنت ءُ وتی زند ءَ وتی وڑا گوازین۔۔۔۔۔ اے چیز ءِ ترا آجوئی انت۔۔۔۔
مصطفیٰ گشیت ہما روچی ءَ پد پدا من وتی مات نہ دیستگ۔۔۔۔۔۔۔ مصطفیٰ پدا قاہرہ کہ روت گڑا اودا مسز روبنسن ءُ آئی ءِ مرد مصطفیٰ ءَ وش اتک کننت۔۔۔۔ مصطفیٰ چیزے وہد قاہرہ ءَ گوازینیت ءُ سکیں بے تواریں چُکے بیت ءُ مسز روبنسن آئی ءَ گشیت مصطفیٰ تو چونیں مردمے ئے کہ نئے کندئے ءُ نئیکہ گپ جن ئے۔۔۔۔۔
پدا وہدے مصطفیٰ لندن ءَ کہ روت گڑا بازیں جنک ءُ جنیناں وتی دام ءِ چمگاں کاریت ءُ آہاں گوں وپت ءُ واب کنت۔ آہانی تہا ہمنڈ، شیلا گرین وڈ، جین مورس، از بیلا سیمور ہوار اَنت۔۔۔۔۔ مصطفیٰ ءِ گورا ہرکس کہ وپت ءُ واب کنت پدا دیر نہ گوزیت کہ وت کُشی کنت۔۔۔۔ اِے درست وت کُشی کننت۔۔۔۔ مصطفٰی ہمیشانی سبب ءَ لہتیں سال جیل ءَ ہم گوازینیت۔
ہمدا جنکے ءَ مصطفیٰ گشیت کہ شمئے پیرکاں مئے سرا قبضہ کتگ ءُ اودا مئے بلکاں گوں وپت ءُ واب کتگ ءُ مئے وڑیں مردم ودی بوتگ انت ۔۔۔۔۔۔ مصطفیٰ ءِ کسہ دراج اِنت۔۔۔۔۔۔۔ پدا مصطفیٰ اِدا کہ دریا ءِ نیل ءِ لمب انت اِدا کیت گڑا اِدا حسنہ بنت محمود ءَ گوں سور کنت۔۔۔۔۔ گدار ءِ تہا سودان ءِ جاور انت ءُ سودان ءِ چاگرد ءَ جنیناں ہچ وڑیں ارشت نیست ءُ اِدا مردمانی لیکہ ایش انت کہ جنین تہنا پہ وپت ءُ واب ءُ چُکانی ودی کنگ ءِ ہاترا اَنت ۔۔۔۔۔ اِے گدار ءِ تہا کارستانی زندگی نوآبادیاتی نظام ءِ چیدگ انت ۔۔۔۔ ود رئیس اِنت، کہ گشیت جنین ایوکا جنین اِنت جنین ءِ تہا دگہ چیزانی شوہازگ فضول اِنت۔۔۔۔ ود رئیس گشیت ہرکس ءَ اگاں نائیجریائی جنیناں گوں سور نہ کُتگ آ نزانت کہ سُور چی یے۔۔۔۔ ود رئیس انچش انت کہ قرآنی آیاتے ءِ مثال دنت کہ چُک ءُ جنین دنیا ءَ زندگی ءِ زینت اَنت ءُ پدا آفندی آئی ءَ رد کنت کہ بابا چش نہ انت۔۔۔۔ قرآن ءَ اے وڑ نبشتہ انت کہ چُک ءُ مال ءُ دولت۔۔۔ جنین ناں۔۔۔۔۔۔
اِےگدار ءَ مارا بنت مجذوب دز کپیت۔۔۔ آئی ءَ بازیں مرداں گوں زند گوازینتگ۔۔۔۔۔ ود رئیس گشیت ہما مرد دنیا ءِ کمتریں مرد انت کہ سرجمیں زند ءَ یکیں جنین ءَ گوں گوازین اَنت۔۔۔۔۔ حاج احمد انت کہ آئی ءَ وتی زمین ءُ چُک، آخرت ءِ غم اِنت۔۔۔۔۔۔
محجوب انت کہ آئی ءَ سرکاری چست ءُ ایرانی بابت ءَ زانگ ءِ شوک اِنت۔۔۔۔۔۔۔ آئی ءَ ملک ءِ غم اِنت۔۔۔۔۔۔گدار ءَ جاہے آفندی گشیت کہ نوآبادیات نظام ءِ چلائینوک مارا بزانکہ جونئیر آفسراں دمگ ءَ ٹیکس ءِ جم کنگ ءِ پرمان دئے اَنت۔ مردم پدا انگریز کمشنر ءِ گورا شکایت ءَ برنت ءُ پدا انگریز کمشنر گوں آیاں شریں وڑے ءَ پیش کاینت۔ اے وڑا مئے مردم قبضہ گیراں چہ اثرمند بنت ءُ مئے سرا زہر بنت ءُ گشنت انگریز مارا ٹیکساں ماپ کنت بَلے وتی ہمزبانیں افسر مارا ٹیکس گرنت۔ اِے حساب ءَ مئے مردم انگریزی پلہ مرز بنت۔۔۔۔ پدا گشیت ما بِلے کہ مروچی سودان ءَ آزادیں بَلے آ دُور نشتگ ءُ مئے ملکاں چلائینگ ءَ اَنت۔۔۔۔
اِے گدار یک نوآبادیاتی نظامے ءِ آماچیں ملکے ءِ ءُ غلامیں راجے ءِ نفسیات ءَ بیان کنت۔۔۔۔۔
پدا چش بیت مصطفیٰ یک روچے گار بیت۔۔۔ مردم ہمے سرپد بنت کہ مصطفیٰ دریائے نیل ءِ ہار ءَ برتگ۔۔۔۔۔ مصطفیٰ سعید ،آفندی ءَ کاگدے نبشتہ کنت ءُ آئی ءَ گشیت کہ منی چکانی دیم ءِ مردم توئے۔۔۔۔۔ آفندی دگہ جاہے کارءَ بیت۔۔۔۔۔ یک روچے واتر کیت گڑا ود رئیس گشیت کہ من مصطفیٰ ءِ جنوزام ءَ گوں سُور کناں۔۔۔ آفندی پدا مصطفیٰ ءِ جنوزام ءَ جُست کنت۔۔۔ آ گشیت من مصطفیٰ ءَ پد کس ءَ گوں سور نہ کناں۔۔۔۔ اگاں منی پت ءُ برات من ءَ پہ زور ود رئیس ءَ گوں سور بدئے اَنت۔۔۔ گڑا من وت کُشی کناں۔۔۔۔ آفندی پدا روت وتی کار ءَ ، چیزے وہد ءَ پد کیت۔۔۔۔۔ تہ گندیت حسنہ بنت محمود ءَ وت ءَ کشتگ ۔۔۔ پرچا کہ آ پہ زور سُور دئیگ بوتگ۔۔۔۔۔ آئی ءَ وتی ہمراہی ءَ ود رئیس ہم کُشتگ گوں۔۔۔ بَلے مصطفیٰ سعید ءِ جنوزام گڈی وہد ءَ یک گپے کنت کہ من ءَ اگاں کسے پہ زور سور دنت گڑا من ایوکا آفندی ءَ گراں۔۔۔ دگہ کس ءَ نہ گراں۔۔ بَلے اے چاگرد ءَ جنیناں کئے گوش داریت۔۔۔۔۔
آفندی واتر بیت گڑا مصطفیٰ ءِ بندیں کوٹی ءَ روت۔۔۔۔ مردمانی حیال انت کہ اِد حزانگ انت بَلے اودا لہتیں کتاب انت۔۔۔۔ آیانی تہا مصطفیٰ سعید ءِ وتی کتاب ہم ہوار انت۔ پرچا کہ مصطفیٰ سعید ہم یک نبشتہ کارے بوتگ۔۔۔۔ معاشیات ءُ نوآبادیاتی نظام ءِ سرا آئی ءَ کتاب نبشتہ کُتگ۔۔۔۔ دگہ ہما جنک ءُ جنینانی عکس انت کہ مصطفیٰ ءَ آہاں گوں وہد گوازینتگ۔۔۔۔۔۔ یک برے آفندی ءِ دل گشیت کہ کوٹی مانداراں۔۔۔ بَلے پدا چش نہ کنت۔۔۔۔ ہمدا مسز روبنسن ءِ نمدی ءَ ہم وانیت کہ آئی ءَ آفندی ءِ سرا نبشتہ کتگ کہ من وتی مرد ءُ مصطفیٰ سعید ءِ سرا کتابے نبشتہ کنگ لوٹاں۔۔۔۔۔۔ بَلے گڈسرا آفندی کوٹی مان نہ داریت ءُ وت کیت دریائے نیل ءَ دؤر کنت۔۔۔ گورمانی میار بیت۔۔۔۔ پدا دم بارت ءُ مردماں توار کنت کہ من ءَ بہ کِش ات۔۔۔۔ بَلے۔۔۔ کس نیست۔۔۔۔۔
مصطفی سعید کُجا روت۔۔۔ کس نہ زانت۔۔۔۔ بَلے حسنہ بنت محمود کہ مصطفیٰ سعید ءِ جنوزام انت۔۔۔۔ آ ہم وت کُشی کنت۔۔۔۔۔۔
اِے گدار ءِ ہر دَر (باب) وتی یک سنگینیں وانوکے ءَ جیڑگ پرمائیت۔۔۔۔۔ نوں وانوک اِے گدار ءَ کُجام رنگ ءَ زوریت۔۔۔۔ چاگرد ءِ پد منتگیں مردمانی زندگی ءَ اے رنگ ءَ گندگ ءَ گوں آئی ءِ چم ارس بنت یا آئی ءَ ہمے وپت ءُ وابی گپانی لذت وش بیت۔۔۔۔۔۔
گدار ءِ تہا مردمانی پد منتگی وتی جاہ ءَ بَلے مصطفیٰ سعید ءِ سفر کنگ ءُ روگ، کسی نہ بوہگ، مات ءِ اے گپ کہ برو تئی زندگی انت ءُ تو اِے چیز ءَ چہ آزادئے کہ وتی زند ءَ چوں گوازین ئے، پدا مات ءِ نیمگا نہ رؤگ مات ءِ مرگ ءَ پریشان نہ بوہگ، جنکاں گوں زندگی ءِ گوازینگ، پدا واتر کوچگ ءَ آہگ ۔۔۔۔۔ آئی ءِ درستیں جنینانی وت کُشی۔۔۔۔ اِے درست چیدگ اَنت۔۔۔۔۔ مصطفیٰ ءَ یک رندے مورس گشیت کہ دنیا ءَ اگاں ایوکا یک مردے پش بہ کپیت ءُ آ تو بہ بئے۔۔۔ من پدا ہم تئی گوما ناچ نہ کناں۔۔۔۔ بَلے پدا ہمے مورس مصطفیٰ سعید ءِ جنین بیت۔
گڈسرا مصطفیٰ سعید ءِ شپاں واب ءِ تہا کوکار کنگ۔۔۔ بے آرامی۔۔۔ جاہانی بدل کنگ۔۔۔۔ اے کُجام درد انت ءُ کُجام سوک انت کہ آئی ءَ آرام ءَ نئیل اَنت۔۔۔۔۔ آیا مصطفیٰ نادراہے، یک بیرگیرے کہ وتی مردمانی ایردستی ءِ بیراں چہ انگریزاں گرگ لوٹیت۔۔۔۔من زاناں اے گدار ہرکسی گورا روت وتی معنا ءَ بدل کنت۔۔۔۔
من اے گدار وشیں وہدے ءَ ونت۔۔۔ یکے دسمبر ات ءُ دومی من کراچی ءَ اتاں۔۔۔۔۔ ءُ یک گپے ایش انت کہ لہتیں سال انت من وتی میتگ ہم نہ دیستگ۔۔۔۔۔ ہرکس ءَ کہ پہ وت زہیر کنت گڑا اِے گدار ءَ الم بہ وانیت۔۔۔