علی ماں وتی شاعری آدینکءَ
علی ماں وتی شاعری آدینکءَ
تاج محمد طائر 83/2/4ہیت کسر کند
ماں ھنر ی پڑا ھرچ ھنر مندے ءِ تخلیق آئی ءِ وجود ءِ عکس ء ُ آدینک اِنت ء ُ ھرچ ھنر مندے وتی ھنر ءِ تہ ءَ ظاھر ء ُ پدر اِنت اگاں یک نقاشی ءَ گوں طبیعت ءَ دوستی بہ بیت گڑا آئی ءِ نہ لوٹگ ءِ با وجود آئی ءِ آتی ءِ نقاشی ءِ تہ ءَ آئی ءِ وجود ءِ ھب گندگ ءَ کئیت ھمے پیم ادیب وتی نبشتانکانی تہ ءَ شاعر وتی شعرانی تہ ءَ گندگ بیت بلے پدا ھم بازیں ھنر مندے وتی ھنر ءِ چپ اِنت منی اے نبشتانک ءِ سیادی گوں شاعری ءَ اِنت پمشکا من شاعر ء ُ شاعری ءِ بابت ءَ گپ کناں کہ مئے بلوچی دیما ادبی پڑا گیشتر دگہ زبانانی ادب ءِ تہ ءَ کمتر من دیستگ یا مار اِتگ کہ مئے بازیں شاعرے وتی شعرانی تہ ءَ حق ءِ گپ ءَ کنت بلے وت ھجبر حق نہ کنت ھوری ء ُ تپاکی ءِ گپ ءَ کنت بلے وتی زاتی نپ ء ُ سیت ءِ ھاترا ءَ مدام گروپ بندی ء ُ یکّی ءِ بازار اضش گرم کتگ ء ُ زبان ء ُ ادب ءِ دیمروی ءِ جار ءَ جن اَنت بلے حفیں دیمروی پسند ء ُ جہد کنوکانی راہ ءَ ڈنگر ریچ اَنت، چہ کست ء ُ کینگ ءَ بیزاری ءِ بلند گواش دپ ءَ اِنت کُکار ءَ اِنت بلے وتی دل اِش کست ء ُ کینگ ءِ بنہزھ اِنت، بلے اے راستی ءَ ھم من منّاں کخ ء ُ گوشاں کہ ھرچ مردمے علی بخش دشتیاری ءَ چہ نزیک ءَ زانت آ ایشی ءَ ھم سر پد اِنت کہ علی چہ آ شاعراں نہ اِنت کہ وتی شعرانی چپ اَنت علی ءِ شاعری آئی ءِ جرند ءِ راستیں عکس اِنت، ھمے پیم من اے منگی گپّ ءَ ھم منّاں کہ ادب ءِ پڑا شاعری ڈولداریں تھر اِنت ء ُ اے وش ء ُ شیرکنیں تھر ءِ تہءَبازیں تہرے ہست بلئے شائری ءِ تہر ءِ تہ ءَ نظم ء ُ غزل ءَ شرتر جاہ کتگ ء ُ گیشتر نبیسگ ء ُ گوشدارگ ء ُ وانگ ء َ انت اے تہرءِ شائراں ہم وتی شائری ء ِ رنگ ء ُ دروشم پہ الکاپی ء َ ظاہر ء ُ پدر کتگ چوشکہ لہتے ءَ غزل ء ِ تہء َ وت ء َ منّینتگ ء ُ دگہ بازینی ء َ نظم ء ِ تہ ء َ وتی مٹ وات انت بلے دگہ بازیں شاعرانی بابت ء َ چو کشگ گران انت کہ نظم ء ِ شائر انت یا غزل ءِ چی ء َ کہ آیانی نظم ء ُ غزل دوئیں ڈولدار انت، منی پکر ء َ علی ہم چہ ہما شاعران انت کہ آئی ء ِ بابت ء َ چو گشگ پمنا گران انت چی ء َ کہ من وہدے آئی ءِ نظم ونتگ انت من ء َ گمان بیتگ کہ آنظم ء ِ شائرے ء ُ نظم وش نبیس ایت بلے وہدے آئی ء ِ غزل چمانی دیم ء َ گوست انت گڑا وتی گمان ء ُ پگر ء ِ بدلینگ ء َ نا الاج بیتگاں (اے منی گمتن انت بلکیں یکے گون منی پکر ء َ تپاک نہ انت)ءُ منی پکر رد ہم بیت کنت بلے منی کنٹیں پگر ہمئے گش ایت کہ علی ء َ شاعرے ء ِ اے دوئیں تہرانی سر ء َ پہ شری دسرسی ہست ((ترانگ ء ِ شہکور)) آئی ء ِ شائری ءِ کتاب انت نظم ء ُ غزلی مان انت بلی من اے نبشتانک تہ ءَ آئی ء ِ جرند ء ُ غزلانی سرءَ وتی پگر ردءَ چمشانکے دیاں گوشاں کہ علی نوکیں غزلءِ شائرے ء ُ نوکیں یا جدید غزلءِ بابت ءَ مثال دینت کہ جدید غزل ءِ رہبند چوشکہ انچوش مردم دگہ دگہ نام ء ُ رنگ ء ُ بو ءِ وش بوہیں ء ُ زیبداریں گل بہ چنت ء ُ یکجاہ بہ کنت یک ڈولداریں گلدستہ یے جوڑ بہ کنت ہمئے پیم جدید غزل انت کہ لہتے بند نبیسگ بیت ء ُ ہریک بندے یک معنائے دنت آ غزل جوڑ بیت، علی غزلانی وانگ ء َ پد زانگ بیت آچہ جدید غزل ء ِ رہبندء َ پہ شری سرپد انت آئی ء ِ باز کم غزلانی تہ ء َ پکرء ِ تکراری گندگ کئیت، علی بخش ء ِ ترانگ ء ِ شہکور ءَ ہم من یک گلدستہ یے ءِ نام دیاں چی ء َ آ ایشی ءِ تہ ء َ ہم دگہ دگہ رنگ ء ُ پکر ء ِ سرءَ غزل ہوار انت ء ُ اے بابت ء َ من گشاں علی تنیگہ جوان انت بلے آنہ تہنا عشق ء ُ عاشقی ءِ شائرے راستی ایش انت کہ آ زندگی ء ِ شائر انت پمشکا آئی ء ِ
شہرانی تہ ء َ گوں زندء َ ہمگرنچیں گیشتریں بنگپانی سرءَ شئر پہ وانگ ء َ رسیت چوشکہ امیت ء ُ نا امیتی، زہری ء ُ وشانی، گم وشی ڈوبارگ دل ڈڈی ترندی ء ُ لہمی رنگ گندگ کئیت علی ء ِ شائری ء ِ زبان سک وش ء ُ آسان انت اگاں من چوش بگشاں ذروگے نہ بیت کہ نی پگر ء َ علی ماں مئی ہندءَ کشّ ء ُ زپ کست ء ُ کینگ ء َ ترس ء ُ بیم ءِ چاگرد ء ِ تہ ء َ پہ زگریں بلوچی لبزانی شوہازگ ء ُ آیانی وتی شائر یء ِ تہ ء َ آرگ ء َ وتی درور وت انت اے چیز یا ہنر آئی ءِ بازیں شعرانی تہ ء َ ء ُ گوں آئی ء ِ نند ء ُ نیاد اں من دیستگ اشکتگ مار اتگ
پہ در ور
سمبہیت وہدے پمن ء َ دابانی شلی
مئے سرءِ سار ء َ پچ گر ایت ماہیں ہتلی
رؤت ہیال نازرکین تب ء ِ ہنکین ء َ وتی
آسکلک زیر یت لڈّگ ء ُ گاماں دلدلی
یا
کنجلیں چم انت چو شپیں تیر ء َ
بے گومے لگ انت وابیں دلبند ء َ
یا
یک گمے بوجیت آدگہ بند انت کوکری
داں کدی رنج ء ِ دامن ء َ داراں تو بگش
علی غزلانی تہ ء َ لبزانی وشی ء َ ابید پکر ء ِ جہلانکی ہم پہ شری مارگ بیت انچوش کہ من برزء َ گشت کہ علی غزلءِ تہر ء َ پہ شری سرپد انت ہمئی پیم آ چہ اے ہبر ء َ ہم نزاتکار نہ انت کہ ادب ء ِ تہ ء َ زیبدار تریں تہر شائری ئیگ انت غزل شاعری تہر ء ِ نازرکتریں تہر انت پمشکا آ وتی غزلانی تہ ء َ لبز ہم وش ء ُ شیرکنیں کما ایت پہ مثال آئی ء ِ غزلانی لہتے بنداں بچا رات آئی ء ِ غزلانی تہ ء َ چونیں لبز ء ُ گوں چہ رنگیں لزت بکشیں پیمے ء َ کماتگ ء ُ غزل زیبداری ء ُ نازرکی مار اتگ ء ُ پر بستگ ۰
گیوار گلء ِ کلکش نہ انت ہچ وش نہ انت
امروز اگاں دلکش نہ انت ہچ وش نہ انت
من چون کناں ہوراں گلیں باندا تئی
مئے کہ مروچ دل وش نہ انت ہچ وش نہ انت
عمرے شتگ پہ بے وسی دست ء َ مئے
ارماں کس ء َ بش بش نہ انت ہچ وش نہ انت
یا
دوبر چک ات دل ء ِ بندان ء َ ایر کت
املّ بارگیں بالاد قران انت
یا
چوں بدل بیتگ تئی گمان ء ِ رنگ
چو نہ ات پاری تئی زبان ء ِ رنگ
تئی اگاں شیری دروشم ء َ گنداں
گیر کئیت مارا ماہکان ء ِ رنگ
علی ء ِ غزلانی تہ ء َ چوشیں کمالء ُ ہنرنمایی باز گندگ ء َ کئیت بلے آئی ءِ یک دگہ شری پہتوی ء ُ کمالے ایش انت کہ آ یکیں وہدءَ ء ُ یکین غزلی بندے ء ِ تہ ء َ گوں عام فہمیں وشیں لبزاں غزل ءِ لوٹ ء َ پورو کنت ء ُ وتی پکری جہلانکی ء َ ہم درانگاز کنت انچوشکہ آ وتی شئر گیوار گل ء ِ کلکش نہ انت ءِ یک بندے کہ آئی ءِ خوبصورتی ء ُ وشی ءِ بابت ءَ من برزءَ حوالہ داتگ کہ گوشیت
عمرے شتگ پہ بے وسی دست ء َ مئے
ارماں کس ء َ بش بش نہ انت ہچ وش نہ انت
اے بندء ِ تہ ء َ مردم ایر بہ کپ ایت ء ُ ہیرت چاری بہ کنت گڑا گندگ بیت کہ بش بش ورگ ءَ انت ء ُ گشگ ء َ انت مئے عمرے پہ بے وسی شتگء ُ پہ بزّگی گوستگ بلے ما ایں کہ ھچ سد ء ُ سارءَ نہ ایں پہ وتی بدیں جاورانی بدلینگ ءِ جہد ء َ جہنم ما چہ وتی بے سدی ء َ پشت ءَ پشت کپگ ءَ اپسوزی ہم نہ ایں علی اے ہم زانت کہ مردم داں وتی ردی ءَ ردی یے مماریت آ وتی بدلینگ ء ِ کوشستءَ ہم نہ کنت ء ُ شر ہم نہ بیت ءُ آ چہ اے ہبر ء َ ہم سر پد انت
کہ گوں یک یکی ء ُ ناتپاکی ءَ ہچ راجے پہ شریں منزل ء ُ آپسرے ء َ سر نہ بیت آزہم جن ء ُ جنگی مردے نہ انت آیک بے وسیں راجئے ءِ بزگیں شائرے پمشکا آگوں وتی شائری ء ِ زبان ءَ وتی بے سدّیں ء ُ وش وابیں راجءَ ٹوہین ایت ء ُ گوش ایت:
دیر کنیں زہرء ُ کینگ ء ُ کستاں
دوستیءِ پلیں چادر ءَ پوشیں
پد ء َ اپسوز وات ء ُ بے راہیں راہاں روکیں ء ُ سرگردانیں ء ُ مپتیں جاک جنوکاں پہ بژنیگ بیت ء ُ گوش ایت:
کے بہ کنت سرپد اے راہ ءِ راہی ءَ
نئیت گلیں منزل پہ جاک ء ُ واہی ءَ
اگاں کسے ء َ علی چہ نزیک ء َ دیستگ ء ُ گوں آئی ءَ ہورء ُ تور انت گڑا آ پہ شری زانت کہ علی چونیں مردم دوست ء ُ مہماں جلیں مردمے آئی ءِ بلوچی پتر ہجبر ہالیگ نہ انت آئی ءِ کرّا
ہرچ پیمیں مردم کئیت ء ُ رؤت آئی ء ِ کرا جہلی ء ُ برزی نیست ء ُ درستیں مردماں یکیں چم ء َ چار ایت پمشکا آئی ء َ وتی چاگرد ء ِ نابرابری سک تورین ایت ء ُ چوشیں وہدء َ آ چو سیاسی سروکے ء َ جاک نہ جنت ء ُ مپتیں پیتاری نہ کنت راستی ایش انت وتی شاعری ء َ وتی پیام رسان کنت ء ُ گوں وتی راج مستراں گوں ہمایانی زبان ءَ دزبندی کنت گش ایت:
توئے ہاکی مناں ہاکی رویں ہاک ءَ
من ء َ بزگر وت ء َ بادشاہ مکن واجہ
دگہ جاہے ء َ چوش گش ایت:
من پہ گم ء ُ تو بے گمے انگت وت ء َ انساں گشئے
من تئی ازاباں پیلشاں ہیپ انت وت ء َ را ہان گشئے
علی وتی زاتی زندگی ء َ ہم سکیں آرام تب ء ُ زیت ہور ء ُ تور بیوکیں مردمے پمشکا آئی ء ِ شائری ءِ تہ ءَ ہم جاک ء ُ جیک نعرہ بازی ء ُ گرّ ء ُ ہکل نہ بیگ ء ِ برابر ءَ انت آہرچ کارے کنت پہ لہمی ء ُ گوم ء ُ گیگ ء ُ سر پد کنگ ء ِ وڑءَ گوش ایت:
نمن ات من شپءِ سیاہی نمن ات
جہانء َ زور ءِ بادشاہی نمن ات
شپانک ءُ بزگ ء ُ اے سردرانی
من ہک ء ِ گار بیگواہی نمن ات
اے دوئیں بندانی تہ ء َ آئیءِ وجود ء ِ لہمی پہ شری ء َ گندگ ء َ کئیتء ُمارگ بیت آ چو لہتے شائر ءَ بانز نہ گرایت چی ء َ کہ ائی وجود ء َ برانز گرگ ء ُ جاک جنگ نیست پمشکا آنہ گوش ایت کہ نمناں گوش ایت نمن ات چوشیں آرامیں پاتراپ آئیء ِ شائری باز جاہ ء َگندگ کئیت اگاں مردم یک پہ یک ء َ مثال دیگ ء َ بہ لگ ایت گڑا کتابے جوڑ بیت گڈسر ء َ من اے راستی ء َ بمناں ء ُ بگشاں چو نہ انت کہ علی ء ِ شائری ء ِ کتابء َ نزوریں ء ُ پہ زوریں شعر مان نیست شرّ انچوش بے ایبء َ نہ بیت پمشکا علی ءِ شریں شئراں گوں ہور نزوریں شئر ہم گندگ ء َ کئیت من علی ء ِ بابت ء َ پہ پہراے ہبر ءَ گوشاں کہ علی چہ آشائراں نہ انت
کہ من آئی ء ِ بابت ء َ بگشاں آ باندا شر بیت راستی ایش انت علی چہ ہما شائران انت کہ باندا شرتر بیت بلوچی سبز ء ُ آباد بات
گیچین چہ ترانگ ءِ شھکور