لچّہ : اوشتگ بلوٹاں من اگں۔ لچّہ کار: پزیر جی ایم
لچّہ : اوشتگ بلوٹاں من اگں
لچّہ کار: پزیر جی ایم
لچّہ کار: پزیر جی ایم
۔۔۔۔
وشی ءِ برزیں کَنڈَگءِ ,
اوشتاتگیں,
بادام بَکشُوکیں اَدار
لَڈّیت ءُ رؤت
۔۔۔۔
گَپانی رُژنائی مِریت
آواز سیاھیں سِنگےءِ ساہءِ تہا بُکِیت منی
۔۔۔
چو بِیت کسے استارے ءِ چمءِ تہا چاریت منا
چو بِیت اناگاہ بِینَگّی ترمپے بہ گوازینت منا
۔۔۔۔۔
مَرکءِ گلاب پوشیں ھیال
بَردَستءِ وَنگءِ لَہمُکیں ہُشک سورتیں پوستءِ تہا
بے تِیرُکءَ تریاک وارت
۔۔۔۔
زی من تہاریں کاڑےءِ شوہازءَ کوہ ایر بُرتگ اَنت
مرچی بلَے دمبرتگاں
۔۔۔
ڈیہہ ے کہ دائم زَرد بیت
ساز ءُ توار بد رَنگ بَنت
کَندگ،
خمار،
امیت،
تام،
سئیل ءُ حوا
چو روچءِ گڈی ساہتءِ دمبرتگیں روچءِ وڑا
دْرس بے کساسءَ ژند بَنت
۔۔۔
سَک دور تہل ءُ زھریءِ دْرسیں دمان اوشتاتگ اَنت
من سرگراں
۔۔۔
راہے ہمِینچُو دُور بیت بلکیں ہِمینچُو راست بیت
کسے ہمینچُو آگہی گِندیت ہمِینچُو واب بیت
۔۔۔
اے ماہ ءُ روچ، استار، دریا، آس ءُ آپ
چہ منی تہنائیءَ بس کمّکیں زیباتر اَنت
چہ منی بچکندگاں بس کمکیں رُژناتر اَنت
من چہ اِشاں دیماتر آں
۔۔
من گِیرےءِ اِسپیت پوشاکیں گلابءِ کَندگانی تُنی ئیں دَستاں کہ اَنوں پْرشتگاں
من ایوکیءِ تَریں بالادءِ تہا ایر اَتکگاں
پہ من تواری شِیرکنیں کاہے،
چراگے راہ بدئے
پہ من چہ روچءِ اندرءَ یَک آسی ساہے راہ بدئے
پہ مَن چہ نُورءِ جنّتءَ کَندُوکیں ماہے راہ بدئے
۔۔۔
من چہ پیاپیں رولہءِ شہکورءِ پُلءَ جُست کُتہ
من چہ تیابءِ زیمراں،
زیباتر آں؟
دوستاں ترا؟
۔۔۔
نُوں گَپ بِکَن
پرچا آ روچءِ وَشبو ءِ جِیگءَ نہ چارینیت منا
پرچا آ ماہءِ چَمگءِ آپ ءَ نہ وارینیت منا
۔۔
واب ءُ ھیالانی تہا بانوری شارے ناچ کنت
مرچی منی ہمراہیءَ کوہنیں خمارے ناچ کَنت
۔۔
چو بیت اناگاہ بِینگّی ترمپے بگوازینیت منا
وَشیءِ برزیں کَنڈگءَ,
اوشتگ بلوٹاں من اگں
۔۔۔۔