لچّہ: منی پَشکپتگیں بَھرے ھمُودا اِنت
لچّہ: منی پَشکپتگیں بَھرے ھمُودا اِنت
لچّہ کار: خالق ارمان
شِیریشّے لوگءِ پیژگاہءَ گِدارے زَردترّان اَت
کہ( نوں ) بے آپی ءَ مُرتہ
منی جاں بڈّیءُ بے تھمبُلی بیت کنت
(ھمے بیت ، ھئو)
شِنکّوے پہ ماتیں بُزگلءَ ھینّار ، پینگان اَت
رمَگ چہ نیاتکگ اَت کوہ ءَ
ھمے دِل سِستگیں ساھت ، ھمے دِیگر
ھمے بیگاہ ، سُھریں رولھی رنگاں منی چمّاں رجینان اَت
زھیرونکیں دلءِ تھنائیءِ ٹپّاں کُدینان اَت
ھمودا ، پیرزالے ھم ۔۔۔
شپ ءِ بے آسریں روچاں ھسابءَ اَت
منی جُستاں ، جواب ءَ اَت
نوں چَندے سالاں پد جیڑاں
اے ھَپت دریائیں دُوریّءَ
تاں چمّے کار کنت تھنا زِر اِنتءُ بس زِر اِنت ھرچی
بلئےاے زندگی انگت
وتی اے بَھربَھریں ٹُکّراں سَد بَھر کنت چاریت
منا ھَنچو گُمان اِنت کہ
منی پَشکپتگیں بَھرے ھمودا اِنت