نیاز ناز بلوچ ءِ دیدانک
ھانل اِنت زمین مسکیں۔ نور سلام نور ءِ کتاب ءِ دیدانک
ہؤ نورسلام نور ءِ اولی شائری کتاب انت کہ منی دست ءَ انت…
“ھانل انت زمین مسکیں” کتاب نور ءَ مراد بات…..
چوناہا تچکیں گپ ایش انت کہ من پہ کسی کتاباں دانکے ہم نبشتہ نہ کتگ ءُ پہ دگہ کتابان نبشتہ کنگ منی وس ءَ چہ ڈن بوتگ ءُ ڈن انت۔۔۔۔۔۔۔۔
بلئے نور منی چمانی دیما رُدوکیں مردماں چَہ یکے من نور پہ رُدگ ءَ چماں وت دیستگ ءُ اے مَنگی گپے کہ نور ءَ وتارا وت رُودینتگ۔۔۔۔۔۔
وتارا وت رودینگ ءُ یک جاھے ءَ رسینگ ءَ مردم ءَ ہزاراں جنجالانی دیمپان بوھگ کپیت بلئے نور چہ اے درائیں جنجالاں گوستگیں مردے کہ مرچی رستگ ءُ مزن بوتگ۔۔۔۔۔۔۔۔
بلئے دگہ گپے ایش انت کہ نور دگر ءَ رودینگ لوٹیت اے نور ءِ نیک نیتی انت۔۔۔۔۔۔۔
اے اَہد ءِ ورنائیں شائرانی تہا نور منی دلدوستیں شائراں چہ یکے، نور ءِ شائری ءَ درد چکاریں سہب، انگر ریچیں بیگہ، بزگانی توار، راج ءِ درد، گار ءُ بیگوائیں مردماں پہ ارس ریچوکانی پریات، پہ بلوچ ءِ وشھالی ءِ ھاترا درکپتگیں کوہی بامردانی بزگی، شد ءُ تن، ھید ءُ ہون ریچی درست ھوار انت بلئے نور پد ءَ اے چیز ءَ ھم سدک انت کہ اے درستیں بزگیانی مز آجوئی انت کہ پہ ما پیداک انت۔۔۔۔۔
ارس ءُ ہونانی بدل آجوئی
کیت پہ شادہ ءُ گل آجوئی
نور دل سپائیں مردمے بَد نیت ے نہ انت ءُ نور ءِ مہروانی ءَ ھما مرد سرپد اَنت کہ نور ءَ گوں وہد اش گوازینتگ یا کہ گوازینگ ءَ اَنت۔۔۔۔۔
ءُ نور وتی دل سپائی ءَ چہ رَد ھم وارت جاگہ جاگہے,
پمشکہ وت گشیت کہ….
من نور دل سپائے آں
من رَد وراں بَرے برے
نور دم نہ برتگیں مردمے وتی مرادانی منزل ءَ رہادگ اِنت.. نور ءِ چمانی دیما ءُ دل ءَ پہ منزل ءَ ابید دگہ ہچ نیست ءُ گوں مہکمیں ارادگاں دیما جنزاں انت.. وتی لچہے توکا وتی مہروان ءَ اے وڑ گشیت کہ:
بُگش باریں تو چے لوٹئے؟
تو چی لوٹئے، من چے بیاراں؟
منی جند ءَ مہ لوٹ تہنا کہ من پہ آجوئی ءِ منگہیں روچاں
زمین ءِ موکگ ءَ رپتاں
منی واتر بُؤگ دروگے
دگہ پہ تو من چے بیاراں؟
نور ءَ چاگرد ءِ سرجمیں نیمگانی ھیال گور اِنت ءُ ھر چیز ءَ گوں ھورتی ءَ چارگ ءَ اِنت، نور چہ چاگرد ءَ جدائیں مردمے نہ انت راج ءِ ورناہانی سُر ءُ پُراں گندیت ءُ گوش ایت کہ:
عاشقی ءَ بید ءِ یکیں ہچ دگہ کار ءَ نئیت
آکبت باریں چہ پیما بیت پدریچ ءِ منی
نور, بلوچ راج دپتر ءَ چہ واکپیں مردمے بلوچ ءِ میار جلی، بلوچ ءِ مہمانداری، بلوچ ءِ دود ءُ ربیدگ ءُ بلوچ ءِ زند ءِ درستیں تک ءُ پھناتاں آشنا انت،
آ میار جَل کہ سالونکیں سراں بکشائیت
کُل ءَ نیمروچ ءَ نہ وپسیت, گِدان ءَ نہ کپیت
ءُ نور اے چیز ءَ ھم شر زانت کہ پہ بلوچ ءَ شہماتے کُوشے ءِ برابر ءَ انت۔۔۔۔۔پمیشکہ گوش ایت:
مردمے ءِ کوش ءَ چہ کمتر نہ انت
پہ بلوچ ءَ مشت ءُ شہمات ءُ لگت
نور ءِ شائری گون منا سَنگ ءُ تور نہ بیت پہ کمزوریں باسکے ءَ گرانیں بارے بلئے اِنچو گشاں کہ نور ہمے گاماں برجم بدار ایت آؤکیں وہد ءَ دلانی سرا بادشائی کنوکیں شائرانی لڑ ءَ ہوار گندگ بیت۔۔۔۔۔۔۔۔!!
نیاز ناز بلوچ
