**–کْیاس گِر–** شائر: آصف شفیق
**–کْیاس گِر–**
شائر: آصف شفیق
شائر: آصف شفیق
روچ درافشان ءَ اتکگ دریگ ءِ دپ ءَ
آسماں بستگیں پردھاں پچ کناں
رنگاں توراں ءُ رُشنائیاں کچ کناں
زرد_________ابیتکیں زِرے
سبز________ مُجاں سْرپتگیں اشرپی چانگے
سْیہ_____ھیالے کہ آوار جتیں دْرچکے ءِ ماتی ءَ جیڑتگ
سُھر_______توارے کہ ھِچ بند ءُ کید ءَ نئیت
چاکہ ھوش اِنت من ءَ
بس ھمے یکّیں فکر ءُ ھمے یکّیں جیڑگ منی مستر اِنت
کہ زِیر کِلیتاں ءُ دروازگاں پچ بہ کن
گوات ءِ دروازگ ءَ
آس ءِ دروازگ ءَ
ساز ءِ دروازگ ءَ
باس ءِ دروازگ ءَ
چیزاں چاران ءُ مانا دیان ءَ رواں بیتگاں
ھر شے ءُ دراھیں ازباب نکش ءُ ھمک چیدگ ءَ
گال ءُ بولی بَیان
تانگو سر گپتگاں !
جاھے ھیران ءُ چاران اوشتاتگاں
جاھے جلّان ءُ داران رواں بیتگاں