°ھامگیں بچکندے کلوہ بنداں°۔ شائر: عبداللہ میر
°ھامگیں بچکندے کلوہ بنداں°
عبداللہ میر
جی ترا بات انت کوش ملیبار ءِ
ماھو ءِ زلپ ءِ وشبواں کار ءِ
نوبت ءِ شھدیں لزت ءُ تاماں
من ھمے اَھد ءِ بیوسیں بامر
کہ لگتمالاں موسماں چاریں
بکچہاں بنداں من زھیرانی
ستکگیں بالاد ءَ دیاں جونکاں
ارس گواراں چہ زاگُلیں دیداں
منگھیں زردوں بے تو ھیناریں
بے دلیں اَھد ءِ ناشریں دوداں
مرگ سند ایت یا زیادھیں زورے
ھامگیں بچکندے کلوہ بنداں
اَچ ھما زید ءِ کوکراں بَشی
جیھراں نیادانی سر ءَ شنز انت
چو منی امبوئیں دل ءِ لھڑاں
پہ گدارے ءَ کُچّگاں ویلاں
زھیر من ءَ تواپے دیاں زئیپیں
دل مرادانی پَلو ءَ بستگ
گیر من ءَ کاینت بمبھیں دوست ءِ
گیش منی ماھین ءِ شکرگالیں
گنگلیں کاڑانی تلاہ رنگ ءِ
مھر تئی زیدیں کلمت ءِ دروشم
چم تئی موتی لال ءُ مُروارد
کلمتی میرواڑی شپیں لنکُک
پُلک ءِ پیروزہ ثمرقندی
گوش گونا ڈانڈاری بلوچ جَنگاں
کوپگ ءَ ٹک اَنت نال ءُ جالاری
اَچ ھما مالاری ھُنر منداں
دوچگراں کولواھی اَجب نازیں
ادلساں دوچ انت پتو سوگاتی
بیا منی ماھو ھمل ءِ زید ءَ
شاگ ءَ تیلین ءَ ساوڑ ءَ نیلیں
لوٹوکے لوٹیں جھاو ءِ ھنداں
کلمت ءِ میر ءُ مھتراں زرنگیں
پیش کماشان ءُ ھلک ءِ سرداراں
باج مئے مھر ءُ مھرمیں دوداں
کول ءُ اکراراں پُر ھکایتیں
شریعت ءَ رسمانی سر ءَ بندیں
