لچّہ : لیبر ڈے
لچّہ کار : غفور شاد

ھرشءِ ھُدا
پَرش ءُ زمینءِ وازدار
ما چے کُتگ؟
تاں واجہءِ گوک دُز اِتگ؟
تام بی بیءِ سُھرءِ ھزانگ ما جتگ
سرکارءِ کْوام سیم گُڈ اِتگ
ما چے کُتگ گوں بے گُناھیں واھگاں
دل کودکی پرماھگاں
گرمانی جل
تبد ءُ لوار
ما گژن ءِ زمزیل بستگیں بنیادماں
پہ چوریگاں
نانانی واباں دیستگیں
شپ روچ ،کُت اَنت
چے لوٹ اِتگ گیشیں دگہ؟
دیّانءِ دیّانیں درءَ
پہ ما توامیں زندگی
بے منزل اِنت
گژنءِ نہ کِٹوکیں جھانے جھندم اِنت
دیم ءَ دگہ چے است تماہ
ما پوہ نہ بیں
نانءَ چہ گیشیں واھگے است اِنت اگں
زانگ نہ بیت
مئے گیدیءَ
دل زور کنت
گِراں چو بندیت تپلےءَ
مجبور کنت
پگرانی دوزہ دروشمیں
آسے تھا جمبور کنت
ھرشءِ ھُدا
پرش ءُ زمینءِ وازدار
ما چے کُتگ
گوں بے گُناھیں جیڑگاں
نانانی واباں دیستگیں
شپ روچ کُتگ
٭