قدیر لقمان ءِ لچّہ : من وتی اھد ءَ وتی جند ءِ تب ءَ سھَڑیناں
لچّہ : من وتی اھد ءَ وتی جند ءِ تب ءَ سھَڑیناں
شائر: قدیر لقمان
من وتی اھد ءَ وتی جند ءِ تب ءَ سھَڑیناں
انچیں باریگے ءِ بندات ءِ شُبین ءَ زوراں
انچیں داوایے حُسینی ءُ یزیداں بنداں
انچیں راستی یے چرے جنگ ءُ بجنگاں در بئیت
کسّھے نوک بکنت ھمل ء جیھند منی
من وتی اھد ءَ وتی جند ءِ تب ءَ سھَڑیناں
مرچی داتگ مں ببا، ٹپ اگاں آزگ بنت
مرچی سرپْروشی ءِ الھان ءِ ستارہ در کئیت
روچے دیوانے مڑاھانی سباھے کاریت
روچے دوزواھے منی سیاھی ءِ رنگاں داریت
چاڑ اوپاراں کنان بیت زمانگ پمّن
من اگاں اھد ءَ وتی جند ءِ تب ءَ سھَڑیناں
ایوکی تیر ءَ منی سینگ ءَ سُمبان بہ بیت
کاڑ مھنائیں بہ بنت دُور چہ اوپار ءَ منی
اے منی ھاک اِنت، منی گْواھی ءَ در کئیت کسّے
کسّے بیتیں منی تھنائی ءَ را گواز بکنت
کسّے داریت مئے تب ءَ، آ مئے تب ءَ سینگاریت
من پدءَ اھدءَ وتی جند ءِ تب ءَ سھَڑیناں
تَھہ کُشیں مھر بچار دیدگاں پیوست نہ اِنت
دید ءِ سُھری کہ امبروز ءِ جلانی منّت
چو ھوں بوت کنت کہ کسّے پہ وتءَ اوپار بکنت
چو ھوں بوت کنت کہ دلے وشّی ءِ بیپار بکنت
گراں قدر!! نرمکیں گلّہ ھوں دلاں لھَڑیناں
من وتی اھد ءَ وتی جند ءِ تب ءَ سھَڑیناں