دپ ستر چم ءُ دل ءِ ھم پَت نہ انت
دستونک
زاھدہ رئیس راجی
دپ ستر چم ءُ دل ءِ ھم پَت نہ انت
چَہ وت ءَ گیش آں دمے فرصَت نہ انت
ھرکد ءَ دریایے ئے ، کوراں بہ نوش
اُمر ءِ پُرّیں کاسگ ءَ ، ھاجَت نہ انت
ھرکسے پُرس ایت، رس ایت اِے آسرءَ
چَہ وَت ءَ سِستگ، دوبر رَھوت نہ اِنت
آگھیں چمانی واباں پُرس اِتگ
مُدّتے پد زندگی، گوں وَت نہ انت
سبر ءِ ھاٹیگ ءِ دُوا پشت کپتگ اَت
یا سگ ءِ جان ءَ دگہ زیکت نہ اِنت ؟
بیا وتی داب ءَ بہ سنگاراِت تب ءَ
دُژمنءِ کست ءَ مُدام کُدرت نہ انت
زند ءِ جھدانی ھُنر ارساں گوپ ایت
واھگاں پیراں سری ابرت نہ انت
راجی ءِ پدگیرءُ رندگیراں بہ گوش
انکدر بے سار ی ءَ ، باوت نہ انت
8 اگست 2019